Osimhen

Victor Osimhen ya zama dan wasan da kowacce kungiya a Turai za ta yi fatan ta mallaka, wanda ya ce yana mafarkin buga Premier League.

Lamba tara ne da ya kware a cin kwallo idonsa idon raga, mai tsawon sama da kafa shida. Dan wasan Manchester City, Erling Haaland da na Tottenham, Harry Kane ne ke gabansa a cin kwallaye a manyan gasar Turai biyar a kakar nan. Osimhen shine kan gaba a yawan cin kwallaye a Serie A mai 19 a raga a wasa 22 da tazarar biyar tsakaninsa da Lautaro Martinez na Inter Milan.